МӘМС: буындарды эндопротездеу енді Жезқазғанда да жасалады
Ұлытау облысында алғаш рет МӘМС шеңберінде тізе және жамбас буынын эндопротездеу отасы жасалды.Бұл - зақымданған буынды жасандысына айырбастайтын өте күрделі ота.
Бұрын-соңды мұндай оталар еліміздің ірі қалаларында жасалатын. Тиісінше кезекті де науқастар ұзақ күтетін.
Енді эндопротездеу алысқа бармай-ақ Жезқазған қаласында әлеуметтік медициналық сақтандыру қорының жеткізуші "Жезқазған медициналық орталығы" ЖШС базасында қолжетімді.
Қаражал қаласының тұрғыны Лейла Шубаева аяқ басып, жүруден қалғанына 1 ай болыпты. Енді, міне, МӘМС арқылы тегін операция жасатып, адымдай бастады.
Лейла Шубаева дербес төлеуші, яғни МӘМС жүйесіне жылына 51 мың төлеу арқылы қымбат отаны тегін жасатты. Жалпы, мұндай отаның құны – 2 млн теңгеден асады.
Ал қазақстандықтар МӘМС қаражаты есебінен осы мүмкіндіктерді тегін пайдалануға құқылы.
Екі күннің ішінде медициналық орталықтың травматолог-ортопедтері 3 жамбас, 3 тізе буынын ауыстырған.
